容祖兒港普成笑料大方回應 鄭秀文相隔24年再出席樂壇頒獎禮

一個樂壇頒獎禮於元旦日隆重舉行，啱啱由英國返香港嘅容祖兒，特登趕嚟攞獎，不過佢喺台上演繹得獎歌曲《九秒九》時似乎有啲聲沙，原來Joey又再病咗，所以佢話自己2025年最重要嘅願望係保持健康。
容祖兒
講到之前佢同薛凱琪喺《聲生不息大灣區季》中，以港普對話鬧出唔少笑話，短片仲喺網上引起熱議，Joey就澄清話佢哋絕對唔係刻意搞笑，「其實我覺得自己聽得好多㗎啦，但係有陣時錄影呢，天昏地暗，Energy Level低嘅時候，有少少間歇性失聰，同埋理解能力都會低咗。」
Gin Lee
Gin Lee李幸倪今晚終於如願首奪女歌手金獎，而佢嘅下一個目標，就係喺紅館開騷，Gin Lee話自己已經入紙申請，雖然未有確實日期，但係相信應該好快會落實。
馮允謙、雲浩影、陳健安
馮允謙呢晚奪得男歌手同唱作人雙料銀獎，而佢自己創作嘅歌曲《會再見的》更勇奪至尊歌曲大獎，創作實力備受肯定，難怪師妹雲浩影都催佢快啲還歌債。不過阿Jay就話想暫時擺低工作，比自己去下旅行休息下先。
鄭秀文
至於鄭秀文呢晚就驚喜現身，親自領取我最喜愛女歌手獎，亦係Sammi相隔24年再次得到呢個獎，佢特登著返當年套戰衣，仲勉勵一班樂壇後輩要有信心同堅持嘅勇氣，無論身處順境或逆境，都要堅持，只要堅持就有機會飛得更高更遠。