細細粒減肥逾一年成功減走近200磅 肚腩消失可露腰預計快可水著上陣

一向畀人吃貨形象嘅細細粒陳嘉佳早前宣布因為健康理由決心減磅，喺2023年8月展開減肥計劃，從高峰期近300磅，到去年3月減至160磅，經過不懈努力，最近佢再展示自己嘅新戰績，終於成功減腩。佢更開心貼文話：「今年夏天應該可以著到我最想著嘅…露腰泳衣，本來諗住已經減完，睇嚟再減30會再完美啲(實在條腰真係幾粗吓)。」

當年嘅細細粒圓潤又可愛，不過年前就因為健康原因開始瘦身大計
細細粒去年分享自己立心減磅因由，透露自己憑住堅持同不放棄精神，喺8個內減走近140磅﹐令血糖、血壓、膽固醇等回歸健康水平，亦同大家分享佢嘅減磅餐單，更希望喺40歲前成功達標，令自己身體健康。
經過一段時間已經清減唔少，更成為靚女一族

細細粒亦從美食直播主轉型做健康生活直播主，去年9月細細粒曾透露遇上回彈期，從130磅回升至140磅，令佢再訂下目標喺12月時減至110磅。相信細細粒成功達標先大晒露腰相，上次細細粒分享泳裝照時係用特效拉長下身，期待2025年夏天細細粒可以發放真嘅水著照派福利。

不過佢就認為未到心中目標，希望夏天可以著露腰泳衣曬身材咁話

細細粒好快會變得更細粒