謝霆鋒相隔25年香港再開騷 成為亞洲第一位歌手進駐啟德園

謝霆鋒今日喺社交平台貼出一段佢在啟德主場館場內自彈自唱嘅片段，成為首位香港歌手於啟德開演唱會，片中見霆鋒手執「鋒」字結他、彈《活著VIVA》前奏，旋即引爆回憶殺，世界各地歌迷等足25年，終於等到喇！樂迷紛紛留言嫌霆鋒開兩場太少，好驚撲唔到飛。

霆鋒今次成為亞洲第一位歌手進駐啟德園，佢今日喺社交平台貼出一段喺啟德主場館場內自彈自唱嘅片段，同時發布演唱會海報，海報一望已知喺香港啟德主場館拍攝，一個人一結他，蓄勢待發，似足霆鋒17歲入行，帶住對「熱愛音樂」勇闖娛圈，呢個好消息傳出後，等足25年嘅歌迷為之瘋狂，急不及待等霆鋒帶大家同進「遊樂場」。

謝霆鋒20歲第一次舉行個人演唱會《Viva Live》，創下最年輕香港男歌手第一次進紅館就開六場嘅紀錄。呢次相隔25年，霆鋒再次決定舉行個人演唱會《Manulife Presents Evolution Nic Live》，再為自己創下新紀錄，成為第一位亞洲歌手，踏進香港最新最大的場館，於今年4月25至26號晚上7點半開騷，屆時同樂迷見面。

信用卡獨家優先訂票將喺1月22號中午12點開賣，公開發售資料則稍後公布，呢次霆鋒演唱會海報選址直接喺啟德主場館拍攝，據知連佢新歌MV亦喺場內拍攝，預早帶大家感受呢個新場地。