StarTalk丨高海寧爆湯洛雯超強「調教」馭夫術 馬國明爆曾送錯禮物被要求退貨

馬國明同高海寧（高Ling）主演嘅賀歲片《麻雀女王追男仔》即將上映，呢日佢哋現身TVB娛樂新聞台節目《StarTalk》，高Ling大爆湯洛雯超強馭夫術，分享馬明兩公婆私下嘅甜蜜互動，同時講出擇偶要求。
馬國明同高海寧主演嘅賀歲片即將上映。
高Ling喺開拍前惡補打麻雀手勢，事前做足功課，今次高Ling飾演自細熱愛打麻雀嘅高手，但現實中嘅高Ling就好似馬明嘅角色，皆因佢婆婆唔鍾意打麻雀，所以高Ling同家人好少打麻雀，而馬明笑指細個已被阿媽抱住打麻雀，仲成日玩麻雀，搞到阿媽「小相公」。
高海寧
高Ling呢次喺戲中主動追求馬明，而高Ling喺現實中卻未試過主動追求異性，坦言喜歡自然發展，彼此互相了解，佢最擔心追求者太過熱情，而馬明覺得有信心追高Ling嘅男仔本身條件非常好，高Ling大爆擇偶要求，講明鍾情默默付出型嘅男士，好需要另一半間唔中嘅稱讚，令高Ling增添自信。
馬國明自爆拍拖時曾試過送錯禮物。
馬明自爆同湯洛雯拍拖前用咗半年時間，互相了解先出街，佢笑指試過送錯禮物，靚湯要求退貨換其他嘢，不過婚後已摸清太太喜好，馬明好自豪係幫靚湯搵到心儀嘅手袋。高Ling亦大爆靚湯超強馭夫術，指男仔係可以慢慢調教，又分享馬明兩公婆私下嘅甜蜜互動。馬明笑言有時有選擇困難症，最好就係老婆幫佢揀埋，就連出門口嘅衫都係老婆襯好。