李小龍堂姊夫資深演員俞明 睡夢中安詳離世享年100歲

人稱「俞明叔」嘅資深藝人俞明，2月4號年初七人日喺醫院於睡夢中安詳離世，享年100歲。俞明叔喺年初二因病入院，後被診斷為肺炎，留院期間佢處於昏睡狀態，直至4號家人收到醫院通知俞明叔情況轉差，家屬抵達醫院時，俞明叔已喺睡夢中安詳離世。其女兒Heidi喺社交平台公布父親離世消息，亦感恩父親冇痛冇掙扎離開。
資深藝人俞明於年初七喺睡夢中離世。
原名阮耀麟嘅俞明叔活躍於黑白粵語片年代，初時演活反派角色，隨後轉變戲路演諧趣角色，多年嚟參演超過300齣電影同超過50部電視劇，喺1970獲《歡樂今宵》監製蔡和平邀請加入節目，繼續發揮趣劇技能，佢仲接受過廖啟智訪問暢談唔同年代趣劇嘅分別、分享《歡樂今宵》難忘事。
俞明叔人緣甚廣。
育有三女嘅俞明叔喺1998年正式退休，女兒亦不時喺網上分享爸爸近況，四代同堂嘅俞明叔兒孫滿堂，享受家庭樂。去年女兒分享俞明叔百歲生日相，一家人樂也融融合照，俞明叔亦精神奕奕。
俞明叔喺1998年正式退休。
退休後深居簡出嘅俞明叔，於2015年曾出席EYT聯歡晚宴，當時佢談笑風生形容自己身體狀況。除咗演員身份之外，佢嘅另一個身份就係武打巨星李小龍堂姐夫，以往每當李小龍從美國返港，俞明叔同家人親自接機。

跟俞明叔合作過嘅薛家燕不捨前輩離世，話俞明叔睇住佢大，形容俞明叔係喜劇能手，跟對方合作永遠笑唔停，不論戲內戲外都氹得大家好開心。
俞明叔被喻為喜劇能手。