周秀娜承諾票房破億有泳照放題 張文傑籲觀眾自行分析影評撐港片

今年嘅賀歲片百花齊花，由古天樂、周秀娜等主演嘅電影《臨時決鬥》，榮登賀歲檔票房冠軍，呢日導演麥啟光就聯同戲中演員周秀娜、胡子彤、張文傑German去到戲院謝票，見到觀眾咁鍾意套戲，大家都好振奮。

幾位賀歲片成員現身謝票活動答謝觀眾
對於票房破一千萬，導演麥啟光就話相當高興，至於問到謝票時會唔會有啲特別福利？娜姐就指自己喺戲中嘅衣着都好短好少布，佢又話每次自己拍戲都會有好多假期，而酒店中又有好多泳池，所以得閒都會影下啲泳衣相，娜姐話自己就儲咗好多呢啲相，佢笑言有一億票房就會開放泳衣放題。
娜姐仲以泳裝放題吸引大家入場谷票房

胡子彤喺戲中嘅短褲仔造型令觀眾印象深刻，問到點解唔着出嚟謝票？佢就話前一日已經着過，加上呢日天氣比較凍，所以就冇再着出嚟。首次喺農曆新年期間參與謝票嘅German，就話收到好多祝福同利是，笑言係一個開心嘅體驗。
胡子彤嘅角色造型令人印象非常深刻

有影評專頁批評今年港產賀歲片質素差，引起另一套賀歲片主演張繼聰不滿，仲親自拍片反擊，講起呢件時幾位都有自己嘅睇法，導演麥啟光就話每個人有唔同睇法，言論自由唔需要解釋啲咩，自己亦冇咩所謂。娜姐就話睇劇本都會有唔同睇法，自己亦喺開拍前，曾為劇本同導演討論過好多次，佢覺得一個人嘅意見唔可以代表晒所有人嘅睇法，亦唔可以以一部戲封概括晒所有電影，所以唔需要太介意。German就指每個人都有自己嘅品味，當睇完大家嘅評論，都自己去分析下，睇下呢套戲吸唔吸引到你，如果吸引到就唔好理評論講咩，睇咗先，因為香港電影需要大家去支持。

張繼聰日前反擊影評人批評意見，呢日導演就指尊重外界每一個意見