張繼聰大讚方力申離地好男人催促生Ｂ 情人節隔空向老婆謝安琪示愛閃爆

張繼聰Louis Cheung 喺情人節晚現身一個宣傳活動，聲音導航無人機表演，望住現場嘅情侶成雙成對感覺特別浪漫。阿聰更公開指同老婆 謝安琪Kay Tse 結婚18年「快樂不知時日過」，一直過住幸福生活，每日見到老婆健康開心，就知道自己人生要贏嘅已經在手，盼望同好愛嘅老婆同偕到老走過高山低谷，仲隔空向Kay講I Love You，真係肉麻呀。

張繼聰呢日現身公開活動，都一樣要放吓閃
情人節雖然要工作，不過佢已提早同老婆食早餐慶祝，又帶佢去名店購物以表心意。講到家中小情人囡囡KakaBall有冇呷醋？阿聰話囡囡年紀仲細，未掌握到咩係情人，但自己就自作多情覺得阿女係佢情人，可惜阿女唔係咁諗，所以要再努力追求阿女喇。
呢日仲預早同老婆謝安琪慶祝情人節

至於囝囝張瞻喺情人節就無特別表示，但阿聰亦鼓勵佢多啲拍拖汲取人生經驗，仲叫阿仔溝女方面遇難題可以向自己求助，因為當年追老婆謝安琪時都唔容易，不過就被鄙視喇。
佢又勸新婚嘅老友方力申盡快生小朋友做Daddy

阿聰嘅好兄弟 方力申 喺情人節公布同葉萱Maple Yip結婚喜訊，阿聰話喺朋友群組獲知喜訊，好戥老友高興，更大讚小方為人簡直離地咁好，讀書叻、體育叻，為人又正直，戥佢搵到幸福開心。小方仲向佢哋拆解點樣租飛機求婚。阿聰又話希望小方快啲升呢加入爸爸會，知道對方都好鍾意小朋友。而另一位電影拍檔兼好友蔡卓妍Sa傳出同舊愛石恆聰復合，阿聰就話唔知道，雖然兩人近日常聯絡，但未提及此事。