陳妍希與陳曉8年婚姻告終 傳女方探班遭拒見被爆早已分居

41歲陳妍希與37歲陳曉自去年開始不時傳出婚變，兩公婆一直未有作任何回應，直到今日喺社交平台宣布結束8年婚姻，佢哋感恩遇見對方，今後各自安好，未來共同陪伴孩子成長。

婚變消息流傳多時嘅陳妍希同陳曉，18日正式公開宣佈離婚
離婚消息一出，旋即成為網上熱話，二人結緣於2013年合作拍劇集《神雕俠侶》，佢哋分別飾演「姑姑」同「過兒」戲假情真，於2015年承認交往，2016年喺合肥領取結婚證兼宣布懷孕，隨後喺北京舉行婚禮，以及喺台北舉辦歸寧宴，同年12月誕下兒子小星星。
兩人婚後育有一子，不過近年就鮮有合照

陳妍希同陳曉婚後努力兼顧事業及照顧家庭，不時喺社交平台放閃，近年二人不再曬恩愛合照，亦冇公開互動，最近一次嘅合照已係2023年5月慶祝陳妍希生日，之後傳出二人婚姻亮起紅燈，去年6月再次傳出二人婚姻破裂。
當年過兒同姑姑呢對成婚，令外界感覺非常夢幻

有指兩人已分居一年多，男方搬離愛巢後，斷絕跟陳妍希聯絡，即使女方前往橫店探班，男方亦避而不見，有傳男方態度決絕。陳爸爸於去年底離世，陳妍希獨自返台奔喪，陳曉未見現身喪禮，二人婚姻於今年農曆新年後正式畫上句號。