周渝民指公開悼念舊愛大S太痛苦 坦承與小S已多年無聯絡

大S徐熙媛於本月初病逝，後續新聞依然無間斷，佢嘅前夫汪小菲短暫返北京後，20號傍晚又帶埋現任太太馬筱梅現身台北機場，有傳今次佢係返嚟搵律師商討大S遺產嘅相關事宜，相比起上次嘅悲痛表現，汪小菲今次明顯係作戰格，對於記者喺機場嘅提問亦未有回應。
劉以豪、柯佳嬿、林心如、陳意涵、周渝民
大S離世後，圈中好友陸續表示悼念，不過大S舊愛周渝民就未有公開發聲，呢日仔仔現身公開活動，親口回應面對舊愛離世嘅心情。仔仔指如果自己要悼念一個人，對佢嚟講相對簡單，如果要喺媒體公眾上去講呢件事，或者發表太多言論，佢覺得咁樣對佢嚟講會好痛苦，所以仔仔懇請大家好好將重點放喺該關心嘅人身上。
仔仔指要公開悼念大S的話，對佢嚟講會好痛苦。
問到有冇關心小S徐熙娣嘅情況？仔仔坦承同對方已好耐冇聯絡，自己本身好少上綜藝節目，基本上冇撞到過，仔仔又指知道媒體想問咩問題，佢話自己一直以嚟唔太鍾意將個人嘅感覺擺到枱面上講，佢指大家都會有情緒，但係佢覺得現階段家屬嘅情緒先係最重要，大家多多關心佢哋就好，至於佢哋呢啲邊邊角角嘅人，真係唔太適合講啲咩。之前有人冒用仔仔嘅名義，發咗廿幾個悼念大S嘅嘅動態，對此仔仔就話了解佢嘅人就會知道佢消失咗喺網上已有15年以上，所以大家了解佢就會知唔係佢發嘅。
林心如
陳曉同陳妍希結婚多年婚姻。

呢日出席活動嘅仲有林心如、柯佳嬿、陳意涵及劉以豪，陳妍希同陳曉日前結束8年婚姻，同妍希份屬好友嘅心如，以及曾與對方合作嘅意涵都有被追問此事，心如就話呢個對每個人嚟講都唔係一個輕易嘅決定，事情已經發生喇，希望大家畀當事人一啲時間同空間，等佢哋可以好好處理同消化件事，心如又指會將關心放喺心中，畀朋友多啲空間先係最好嘅關心方式。而陳意涵就指佢同妍希私下較少聯絡，所以喺呢件事上唔太好評論。
劉以豪
日前王大陸因逃兵役而被捕，去年同對方合作實景節目嘅柯佳嬿，就話自己都係睇新聞先知道，而自己亦唔係太了解事件嘅所有細節，所以唔方便講啲咩。而因為王大陸事件，圈中冇當過兵嘅男藝人都被點名，劉以豪亦係其中一人，呢日佢喺活動上就再次解釋冇當兵嘅原因，佢指接到通知後去咗相關單位，接受檢查後因為被驗出椎間盤突出，令佢由甲級變成丙級，亦因而被驗退。