鄭俊弘與愛兒日日夾歌溝通 將到加拿大開班傳授歌手心得

鄭俊弘同何雁詩嘅囝囝讚廷，去年曾經到美國上堂接受治療天使綜合症，返港後Asher表現持續進步，已經學識爬行同跪地動作，早前農曆新年，佢哋仲同Asher一齊跪地斟茶畀長輩拜年。Fred出席一個慈善活動時，透露Asher非常鍾意彈琴，有時會手掌拍打鍵盤，有時會手指彈奏，Fred亦會每日彈結他跟仔仔夾歌，享受親子時光。

鄭俊弘夫婦早前帶Asher赴美尋求治療
下月佢哋夫婦會飛去加拿大舉行兩場慈善騷，繼續為罕見病出力，此行Fred仲會開班，傳授歌手心得同參加比賽技巧，佢話自己以前都鍾意參加音樂比賽，但係無類似課程畀佢讀，佢話可能當地有人想參加《中年好聲音》，相信呢種課堂對佢哋有幫助。

Fred下月同Step會赴加國開慈善騷