《關注關注組》專家分析強迫症成因 鄧梓峰靠筆跡睇出主持性格

J2節目《J2ers︰關注關注組》今晚播出嘅一集，將會同大家一齊關注「強迫症發作」呢個問題。香港疫情持續已經幾年， 唔少港人潛藏嘅毛病都相繼發作。 如果你出街不停要用消毒酒精搓手、去到餐廳又不停用消毒紙巾抹餐具，可能你已經患上強迫症喇。

今集Sonya同Doniven會拜訪註冊臨床心理專家張傳義博士。佢解釋強迫症係焦慮症嘅一種，當中包括兩大範疇︰強迫思想同重複行為。目的係希望做啲嘢，令自己嘅不安情緒同焦慮減低，好似要不停洗手、出門口反覆檢查門窗同鎖匙，就係其中例子喇。而同強迫症好相似嘅，仲有一樣叫強迫性人格。至於有咩分別，張博士喺節目當中會以輕鬆手法解釋，仲會話你聽強迫症嘅徵狀。

訪問中Sonya仲話懷疑母親有強迫症，佢話︰「阿媽喺屋企一見到啲嘢唔整齊 就會焦慮同不安，跟住就會鬧人話『點解唔擺齊啲嘢呀』，對我好harsh，搞到我有焦慮症。」而張博士解釋疫情下，令本身有強迫症嘅人病徵趨明顯，不停用搓手液將行為變成合理化。

各主持又講到日常生活中，強迫症嘅普遍例子，鄧梓峰就話自己會將唔同面值嘅紙幣分好，Juliana有朋友過斑馬線時，會強迫自己只行白色，家中擺設又會將顏色由深至淺排列，好有規律。

另外，今集節目又由擁有筆跡分析證書嘅十郎，從字體分析各主持到底有無挑剔、固執嘅性格。鄧梓峰先提到筆跡分析有兩大學派，一派係從整體判斷，整幅字好似圖畫咁睇、另一 派就係逐筆逐劃分析。鄧梓峰先分析Clevis嘅字跡，認為佢用人用得頗盡、又由英文字「I」睇出 Honey係非常隱藏內心嘅人、Doniven做事就好有計劃、而由Jessica寫嘅「e」，覺得佢為人友善、Sonya就着重個人空間。至於點解十郎話Juliana有強迫症傾向，節目今晚就會揭曉。

《J2ers︰關注關注組》23:00 J2(82台)