由陳維冠(Joe)監製嘅《新四十二章》最近熱播,噚晚嗰集三位年青主角周嘉洛、江嘉敏及鄺潔楹均甚有發揮,劇情講述Zoie(鄺潔楹飾)為幫Mon姐(江嘉敏飾)追求柯仔(周嘉洛飾),大方向對方賜教「港女冧仔大法」,教授秘訣及側頭等關鍵動作外,更以極嬌嗲表情及聲線高呼港女三句「好叻呀」、「點解嘅」、「唔知呀」。
追「柯」心切嘅Mon姐喺卡拉OK中立定決心,側住頭兼擠眉弄眼向柯仔連環拋出港女三句,可惜因為表情誇張兼欠自然,不單止惹來柯仔鄙視,反問Mon姐係咪「瞓捩頸」相當搞笑。
另一幕柯仔因為突然回家,以致偷偷摸摸到訪其家中嘅Mon姐嚇到四圍匿,因而鬧出不少笑話。周嘉洛喺呢場戲要打大赤肋喺屋企長達兩分鐘,白滑結實胸膛及線條分明嘅六舊腹肌非常吸睛;是次並非嘉洛首度晒肌,之前喺《痞子殿下》及《愛‧回家之開心速遞》亦有性感搞笑演出。不過嘉洛受訪時卻謙稱自己身形唔算好,笑謂線條係靠拍劇操出來:「好唔好其實見仁見智,如果你話線條我係有嘅,因為經常消耗多過吸收,加上有時拍戲都會有郁動,所以唔需要刻意操,上鏡都好似有啲嘢睇,但真人就其實好瘦。」
噚晚另一高潮係嘉洛喺Mon姐、Zoie及肥叔(莫偉文飾)幫忙下,揭穿港女Dr. Lau(黃碧蓮Linna飾)收兵真面目。其實Dr. Lau自出場以來一直備受關注,不少網民留言大讚佢有氣質,網民噚晚見到港女Dr. Lau真面目,睇到咬牙切齒。曾為《2012年溫哥華華裔小姐競選》「最上鏡小姐」得主嘅黃碧蓮,2014年因參選香港小姐加入TVB,憑《愛‧回家之開心速遞》刁蠻女子「Dion」成功入屋。
過往演乖乖女嘅Linna,是次𥤮破自己飾演拜金心機女,佢笑言開心監製Joe給予呢個機會,讓佢挑戰自己,今次呢個角色真係好特別,Sweet得嚟又要有啲目的,之前一直做啲乖女角色,今次做同真實嘅自己好唔同嘅角色,覺得好鍾意同幾好玩。
黃碧蓮續指當年讀藝訓班時已與嘉洛相識,覺得對方當時好有才華,更大讚對方gentleman:「佢雖然細過我,但譬如拍攝時好凍,佢會拎件褸畀我。我又記得有一幕佢要公主抱我,但我好驚佢抱唔到我,因為我比較重,但佢都好sweet,冇令我覺得自己好重,雖然佢抱我時手都震晒。」
《新四十二章》逢周一至五晚八點半翡翠台播映