馮寶寶與好友相聚依舊省鏡 劉培基有感而發：我們都有一個身不由己的童年

馮寶寶移居馬來西亞十多年，噚日好友劉培基貼出與馮寶寶嘅合照，二人感情友好，馮寶寶於2019年跟大兒子於泰國旅行期間遇上交通意外，當時佢正跟劉培基傾電話約在當地見面，隔咗一段時間，佢哋再次見面。

相中見打扮高貴嘅馮寶寶手執玫瑰，星味不減，而好友劉培基喺IG寫道：「我們都有一個身不由己的童年，我們也在英國同一所藝術學院 ，修讀不同的課程。歲月在流轉，唯一不變的，是我們的友誼。」同是天涯淪落人，傾偈時特別有共鳴，劉培基與馮寶寶一樣擁有不一樣的童年。

有傳劉培基母親係作家孟君，經濟條件不差，盛傳生母為咗支開兒子尋找第二春，將兒子送去寄宿學校及裁縫師傅家裡做學徒，劉培基於14歲自力更生，開始做銀行信差，其後留學英國學習時裝設計，白手興家成為著名時裝設計師。

而馮寶寶出身自演藝世家，父親馮峰與母親陳惠瑜皆為電影工作者，6歲已成為當時最受歡迎嘅童星，直至佢於16歲時被揭發馮峰唔係親生父親，一度精神大受打擊，曾淡出演藝界一段時間，遠赴英攻讀室內設計，回港後再投身電視及電影圈，佢先後憑《92黑玫瑰對黑玫瑰》、《新不了情》兩度獲頒香港電影金像獎最佳女配角獎，近作有《殺出個黃昏》。

不少網民看到馮寶寶與劉培基嘅近照，有網民表示令人鼓舞嘅係佢哋兩個好堅強又懂事：「沒有因兒時的事而放棄自己，反之是長大後奮發圖強，努力進取，更活出一片彩虹。真心為你們高興並致敬。」另有網民讚佢哋兩位小時候可愛，長大咗靚靚，亦有網民稱讚：「寶寶姐冇變喎，一樣咁靚女。」

馮寶寶現定居檳城，已屆養專處優嘅階段，佢曾歷兩段婚姻，跟首任丈夫共有兩個兒子，人生走過許多高低起伏，馮寶寶曾患抑鬱症須服藥長達18年抗病，慢慢學會看破生死，對每日生活均感抱恩，佢於2019年跟大仔遊泰國時遇交通意外，馮寶寶被撞到鼻骨變形，需要進行矯形手術，幸而傷勢無大礙，稍事休息便回港，跟謝賢相隔60年再合作拍戲，去年12月佢亦回港睇「落花滿天• 管弦光影之旅」音樂會，跟圈中好友見面。