一舞傾城丨三分鐘認屍戲爆層次式喊功 陳法蓉Solo戲引爆洋蔥

由王晶擔任製作人、黃家輝導演的《一舞傾城》，今晚（13日）九點半翡翠台播映大結局。昨晚（12日）播出一集，可謂是飾演沙律的陳法蓉Solo之作。沙律與青龍（唐文龍飾）開心補辦喜酒期間，祝酒之際麻鷹（李嘉飾）突然殺出向志飛（楊明飾）開槍，青龍情急之下為志飛擋槍，青龍臨終前用盡最後一絲氣力為沙律戴上婚戒，沙律抱着老公屍體痛哭。

之後認屍場口，法蓉姐上演近三分鐘獨腳戲，大晒層次式喊戲。進入停屍間後，沙律先是強忍淚水與已離逝的青龍閒話家常，細訴以往甜蜜回憶，直到說出「我真係冇嘢呀」時，得不到回應的沙律終於崩潰爆喊說：「我真係好嬲你，你明明同我講過你會同我一齊到老，你做唔到做咩應承我…」、「我等咗你十幾年喇，你點解要抌低我一個…我冇咗你唔得架…」之後沙律為青龍送上最後一吻，令人動容。

講到這場認屍戲，法蓉姐受訪時透露：「我都唔知拍咗幾多分鐘，淨係知道編劇想我喺呢場戲演得比較有層次，入去時就若無其事傾吓偈先，之後慢慢進入狀態喊出嚟。」法蓉姐指原本還擔心演出達不到導演黃家輝要求，她說：「拍完即刻衝去導演房問得唔得，點知有個演員指住導演，之後我見到導演抹緊眼淚，佢隔籬個演員又抹緊眼淚，佢哋話覺得好好睇同埋好感人。」