StarTalk一氣呵成版｜霆鋒海關新片首兼動作指導 衛詩雅Kenny見證忙到癲過程

平時警匪片多數以警察作為背景，觀眾對七大紀律部隊中嘅緝私部門 海關 相對冇咁熟悉。而拍攝動作片知名嘅 邱禮濤 就搵嚟 張學友 謝霆鋒 衛詩雅 同 關智斌 等演出《海關戰線》，呢日身兼動作指導嘅霆鋒就同近日報喜即將嫁為人妻嘅Michelle仲有Kenny一齊接受《StarTalk》 王鎮泉 專訪，暢談拍攝細節喇。

同一公司合作多不勝數嘅佢哋，今次演出可以話係默契十足，Kenny同Michelle仲爆拍攝現場霆鋒忙到不得了，首次擔任動作指導嘅佢，仲堅持絕大部份動作都由演員親身上陣，盡全力減少電腦特效，希望大家感受到香港電影嘅傳統。

新片槍戰戲唔少，身為海關關員嘅Michelle面對槍林彈雨，拍攝時就一直向戲中嘅「前男友」霆鋒請教喇。Kenny雖然縱橫內地拍攝唔少作品，但係今次一樣面臨唔少挑戰，仲話霆鋒設計嘅動作一啲都唔易做，更深夜要跟佢學開槍呀。

除咗大家都上陣打真軍，霆鋒本人亦要喺寒冬拍攝打底搏鬥戲，由朝浸到晚仲要閉氣拍攝，霆鋒仲爆渴望一Shot落拍攝救人戲，仲話原來早喺《玉蝴蝶》MV時已經開始練習「長氣功」呀。

今次拍攝獲海關傾力協助，連基地同巡邏艇都借出供劇組拍攝，佢哋就話大開眼界喇。而身為「牌照王」嘅Michelle，就連船牌都有，不過就未能一嘗駕駛滋味，仲被一揭Michelle呢個驚失業嘅婆仔周身刀嘅叻叻威水史。

新作當中仲有歌神 張學友 一齊演出，霆鋒就指呢次經驗猶如圓夢之旅，而自己作曲由學友主唱作品，就更令佢更為滿足喇。