洪卓立回復狀態台上獻唱爆喊 許靖韻主動撩師兄對談被嫌棄

小背心許靖韻（Angela）日前喺內地舉行巡迴音樂會肇慶站，肇慶市新區體育中心體育館全場爆滿。適逢音樂會喺暑假舉行，Angela貼心為學生們送上一曲《我們的記念冊》加以鼓勵，期間Angela又分享自己剛畢業踏入職場嘅感受，發放正能量為所有同學們打氣加油。
許靖韻（Angela）日前喺內地舉行巡迴音樂會肇慶站。許靖韻（Angela）日前喺內地舉行巡迴音樂會肇慶站。
音樂會上Angela請嚟相識多年嘅同門師兄洪卓立（Ken）做嘉賓，二人言談間仲講到初相識時嘅點滴。兩人喺台上合唱《在加納共和國離婚》，Ken隨即自爆係首次做音樂會嘉賓，就算自己公司藝人，都係第一次，又話同Angela識咗十幾年，好少喺台上合作唱歌。Angela坦言一入公司就認識Ken，在很多活動上都會見到，笑指二人「互寸」嘅時候比合作更多：「嗰陣時我啱啱入公司，成日喺活動撞到，我係100% E人(外傾型)，我會成日撩100% I人(內向型)嘅Ken講嘢，講到佢覺得我好煩，成日叫我收聲，我哋嘅友誼就係咁而建立起嚟。」引來全場爆笑。隨後，向來感性嘅Ken獨唱自己嘅單曲《回到最愛的那天》時，被歌曲感動落淚。Ken自從2022年底宣布甩拖回復單身後，暴肥咗一段日子，呢日見佢喺台上演出時，狀態回勇，精神同體力都好過之前。
請嚟洪卓立做嘉賓。Angela話佢同立立嘅友誼係鬥嘴得嚟。
完騷後Angela同Ken分別喺社交平台出Post大談音樂會感受，Angela表示感謝Ken將佢嘅第一次「俾咗佢」，隨即引來Ken留言「你能否write清楚少少，what是first time？」搞笑互動。Ken亦喺自己社交平台寫道「不知道有沒有機會，真真正正出一首合唱歌呢？」Angela急不及待謂：「快啲啦！」雖然兩位性格各走極端，但時間同音樂令二人打破隔膜，相信樂迷都期待住兩人未來喺音樂上嘅真正合作。
立立Fit返晒！事後兩人喺社交平台繼續鬥嘴。