文華創立劇團邁向25周年 邀梁非同演四齣任白戲寶

由粵劇女文武生 文華 創辦嘅天馬菁莪粵劇團，邁向成立25周年，劇團計劃一系列活動誌慶，更準備向梨園前輩任劍輝、白雪仙以及唐滌生致敬，又邀請新貴花旦 梁非同 合作，選演包括《紫釵記》、《再世紅梅記》、《帝女花》同《販馬記》四齣任白戲寶。

當中《紫釵記》同《再世紅梅記》門票已告爆滿，而9月底則將為大家演出《帝女花》同《販馬記》。日前嘅記者會上，文華指早於8年前兩人已結戲緣，近3年來合作更多，又笑言自己對呢位小妹妹留有深刻印象，大讚非同勤力又靚女，唱做唸打都出色，認為最近非同獲香港藝術發展局頒發藝術新秀獎(戲曲)係實至名歸 。
 
非同就指文華創作嘅新戲予人耳目一新感覺，今次演出一系列任白名劇，坦言係好大嘅考試，因為戲迷早已耳熟能詳，另外排戲期間大家有非常多交流，無論身段、定係人物情感細節都互相給予意見。