鄭伊健將開首個台灣個唱 獲任賢齊舒淇拍片打氣

鄭伊健出道37年，即將舉行首個台灣個唱，呢日伊健現身台北出席個唱記招，大會更準備連串伊健當年喺台灣宣傳時嘅珍貴片段俾佢回味過去，伊健粉絲亦拍片為偶像送祝福一切順利，睇到伊健好感動。

作為伊健好友嘅任賢齊同舒淇雖然未能到場，但佢地同樣拍片為伊健打氣同點歌，舒淇更喺片中反問伊健點解呢次唔請佢做嘉賓。伊健就解釋：「不能夠經常用她，吃飯比較好啦。」至於面對小齊隔空點唱「茄子蛋」嘅《浪子回頭》，伊健耍手擰頭，笑言擔心觀眾即刻離場。

近日鄭中基無預警單方向合作多年嘅經理人湘湘斬纜兼連環出Post，再出Po透露自己有情緒病兼需要戒酒，大呻前段婚姻唔開心，直至遇到余思敏，事件引發無限暇想，伊健喺受訪時被追問最近有冇同鄭中基聯絡，伊健就話雙方好少聯繫，對方曾經搵過佢做嘉賓，之但係唔啱期所以無疾而終。

因拍劇而同伊健結緣嘅婁峻碩(SHOU)呢日就專程現身記招為偶像站台，伊健初時見到SHOU就覺得對方好靚仔，不過伊健一時口誤將「好帥」講成「好衰」，場面搞笑。
 
伊健同老婆蒙嘉慧喺日本不時會被路人以野生捕獲擺上網，對此伊健大感無奈，令佢最介意係影得佢唔靚仔，笑言希望下次大家偷影佢嘅時候記得開美肌，幫佢美顏一下。