闊別5年彭秀慧再演獨腳戲 新劇同郭富城名曲有關？

舞台出身嘅彭秀慧，近年作多棲發展，除咗跨界執導電影《29+1》、《阿媽有咗第二個》外，佢仲為容祖兒導演51場演唱會，而早前喺電影《談判專家》內，同劉德華合演患有精神病夫婦嘅演出，更令觀眾大為驚艷。而今年11月，彭秀慧終於回歸佢嘅獨腳舞台，再度自編自導自演全新獨腳戲《失憶【諒解】備忘鹿》。
全新獨腳戲《失憶【諒解】備忘鹿》
提到劇名令人諗起郭富城一首歌，對此彭秀慧表示雖然個劇同首歌冇直接關聯，但故事就真係同失憶與諒解有關：「身邊很多人（也包括自己）常常說自己記性越來越差，有時很多重要的回憶和事情我們選擇放在心底，但到底會不會有一天突然完全忘記？尤其見證過腦退化這件事，我就更有感受。 但另一角度看，耿耿於懷的事情，即使可以忘記，卻不等於諒解......失憶可能是一種逃避。所以我想寫一個關於失憶的故事。」彭秀慧指有日諗起郭富城呢首歌，發現歌詞中嘅諷刺意味好有意思，佢仲特登發咗個短訊畀小美，話畀對方知呢次嘅劇名會取材自《失憶諒解備忘錄》，小美聽到後唔只表示歡迎，仲分享咗當年寫歌詞嘅意念。
獨腳戲《29+1》劇照。
向來做獨腳戲都係自負盈虧嘅彭秀慧，今次嘅舞台演出都係由佢獨自投資。彭秀慧坦言而家嘅市場雖然好難預測，因為好多fans都已經移居外地，佢直言呢次自資演出係一場「華麗冒險」，所以如果有贊助商有興趣合作嘅，佢都歡迎傾傾喇。

獨腳戲《月球下的人》劇照。