Zpecial期待校園巡唱與學生互動 Kiri T密密出騷緩和開騷前心情

樂隊 Zpecial 同師妹 Kiri T 一齊到商場舉行小型音樂會同Fans見面，現場吸引眾多途人圍觀。Zpecial同Kiri T即將展開校園巡唱，醉心創作而且形象健康嘅佢哋，作品早已大受學生歡迎，佢哋都好期待同學生們嘅互動。

Zpecial同Kiri T一齊參與商場舉辦嘅音樂會
Zpecial主音康聰話，因為去年舉辦過同類活動好受學生歡迎，所以今年再度追擊，成員Mike透露活動將會同好多同事一齊參與，感覺就好似一班人柴娃娃去秋季旅行一樣。Zpecial稍後有新作推出，曲風會走形格情歌路線，係佢哋出道以來從未試過嘅感覺。
Zpecial成員將會去唔同學校演出

而Kiri T呢日獻唱多首作品，其中《傷心的時候別說話》及《至少做一件離譜的事》兩首主打歌成功打入歌迷心中，現場有好多觀眾都識得唱。而嚟緊Kiri T就會開騷，佢話一直都有啲緊張，好彩近期比較多出騷同觀眾互動，可以當作預習，而令佢最振奮係門票一開賣已經售罄，成為佢最大強心針。

即將開騷嘅Kiri T當呢次表演係熱身