林奕匡創作新歌贈囝囝 坦言錄音時邊唱邊喊

林奕匡 Phil 自從囝囝 Darrien 出世後就感受良多，佢特別創作出新歌《搖籃下的歌》，不過估唔到預先寫好嘅歌詞竟然神預言咗佢嘅狀況與心聲。

Phil話諗返當初知道自己要做爸爸時就已經有好多想法，仲即刻寫咗好幾首歌畀Darrien，不過當時只係想用嚟記載同送畀囝囝：「今次就以寫首歌送俾囝囝為由，邀請咗新加坡音樂人 Marcus一齊創作，寫《搖籃下的歌》嗰陣時我哋隔空合作，但好合拍，個零鐘已經寫好首歌。」
Phil見到囝囝個樣就一臉冧笑。
本身Phil一早安排好錄音，但點知囝囝竟然提早出生：「呢個就係天嘅安排，啱啱佢出院嗰日我就去錄音。其實好得意，情感上係滿滿，但嗰一刻其實好難錄歌，因為情感泛濫，不停係唱唱下就喊。」
每次抱囝囝都小心翼翼。
Phil表示當自己推住BB保護箱行出手術室，由於當時太太仲喺手術室，所以佢只有半個鐘同BB獨處，Phil表示：「當時我幫佢影咗啲相同影片，其中一條片，我有講到『知道你唔知而家發生緊乜嘢事，亦都唔會有任何記憶，但係我會幫你拍低記載一下。』呢句歌詞，就好係我嘅心聲、心情，現實生活中我真係實現咗呢個畫面。」

Phil指雖然新歌唔算係囝囝嘅專屬搖籃曲，但因為佢成日都會唱畀囝囝聽，所以Darrien一定係聽得最多嘅一個，而除咗廣東話版外，佢仲寫咗英文歌詞：「都可以話英文版係特別送俾佢，係我打從心底嘅創作，當中包括我嘅期待、盼望、未知、憂心、鼓勵、陪伴，各種嘅心情。中文版就係同大家分享嘅，因為我相信每個做父母嘅都一定有呢啲感受。」
Phil為囝囝寫咗首歌。
提到成為爸爸後嘅轉變，Phil話起初係有啲雞手鴨腳，覺得BB好脆弱，所以成日都驚整親對方，又怕自己會抱得BB唔舒服：「而家佢硬淨咗，我又多咗經驗，兩個開始有啲默契，佢一日比一日認到多啲我，每日都會俾多少少表情，我哋嘅 connection 明顯愈嚟愈多，所以每日都愈嚟愈開心。」Phil話當自己習慣爸爸嘅身份後，感覺人生好似大躍進咁，多咗份責任。