電影泉攻略丨專訪《帝國驕雄II》眾演員 丹素華盛頓稱手持人頭係古羅馬日常丨EP130

王鎮泉 Jeoffrey 每星期為觀眾提供最熱辣電影資訊，中外猛片專訪花絮上映時間全部集齊，「電影泉攻略」個個星期陪你睇新戲。

24年前嘅電影《帝國驕雄》除咗令 羅素高爾（Russell Crowe）奪得奧斯卡影帝外，仲成功擊敗《卧虎藏龍》等電影，拎埋奧斯卡嘅最佳電影，最近導演列尼史葛再推出續集，外界通常對續集都唔多睇好，但列尼就成功改寫大眾嘅諗法，拍得非常震撼兼有史詩感，喺評分網仲一度有84%嘅新鮮度。而家靠電腦特技可以重現返好多龐大嘅場景，但睇起上嚟始終係爭減啲質感，而列尼呢次就唔靠特技，以全實景去打造一個氣勢磅礴嘅古羅馬競技場出嚟，所以外界對戲中嘅戰爭場面都有正面評價，而早前泉叔就同《帝國驕雄II》一班演員及導演做咗個獨家專訪，傾吓拍攝點滴！

列尼就話自己入行前係一個好好嘅製作設計師，佢轉做導演前，為好多電視節目同廣告設計佈景，對佢嚟講設計係一種藝術嘅體現，而佢自己亦相當享受，所以為咗打造今次戲中場景，佢需要搵到最好嘅設計師，而剛好佢生命中有兩位頂尖嘅設計師，其中一位就係Arthur Max。今次同Arthur一齊再次重建古羅馬，列尼坦言好有紀念性呀。
相隔近四分一世紀後，列尼史葛再製作《帝國驕雄II》

戲中有唔少劍擊場面嘅Paul Mescal，表示自己從來都無試過做呢類訓練，佢又指佢嘅演技導師經常同佢講，對所有事物都要保持孩童嘅好奇心，而佢指呢樣嘢對佢演出呢部電影係好重要，因為佢一個28嘅男人，要改變心態變成一個12歲、好鍾意同朋友玩劍嘅小朋友。

丹素華盛頓（Denzel Washington）戲中同馬有唔少對手戲，佢就同大家分享點樣可以同馬相處得好啲嘅貼士喇。提到劇中要拎住一個人頭嚟演講，丹素華盛頓就搞笑表示呢啲只係古羅馬嘅日常，大家唔需要咁驚訝呀。

片中有唔少策騎場面嘅丹素華盛頓，已經熟練到可以同大家分享貼士

曾演出《帝國驕雄》嘅Connie Nielsen，就分別拍攝第一集同續集嘅分別，佢話所有嘢嘅速度都比以前快，好似以前每個場景都要花幾小時去set up，但而家就冇呢個問題。

再次參演嘅Connie，亦指現今科技進步，大家慳到唔少時間

要同馬騮仔一齊演出嘅Fred Hechinger，表示開拍前都花咗啲時間同對方相處，又指同馬騮仔一齊訓練嘅時間，對方畀到佢一種好獨特嘅快樂。

Fred Hechinger片中同馬騮仔有唔少對手戲

呢個星期嘅新片速遞，有講述兩位女巫友誼故事嘅《魔法壞女巫》；關於兩個喺群體中都係格格不入嘅男女，相知相戀展開同居生活嘅《戀愛大都會》；美國緝毒局探員去台北追捕販毒集團首腦時，重遇舊情人嘅《台北追緝令》；《BAEKHYUN: Lonsdaleite [dot] IN CINEMAS》EXO成員伯賢個人巡演，當中包括佢嘅獨家訪問同幕後花絮。

至於今個星期嘅票房戰況，直至11月20號中午，第三位《帝國驕雄II》、第二位《焚城》、第一位《破．地獄》。