獨家丨「賈名媛」邱芷微幸福嫁相戀十年男友 聽老公愛的誓言激動落淚

恭喜恭喜，喺《愛．回家之開心速遞》中飾演「賈名媛」嘅邱芷微，同拍拖十年、曾參加《功夫新星》嘅男友陳志忠（Wilson）喺邊28號拉埋天窗喇！
 恭喜晒一對新人！
Wilson喺早上十點率領黃建東、羅浩銘等兄弟團成員出發接新娘，出發前佢仲興奮表示心情緊張。另一邊，新娘子芷微就由媽咪為佢著上嫁衣，邱媽媽、邱爸爸祝福愛女同老公未來少遇波折，芷微一度感動哽咽。姊妹團喺新郎哥同兄弟團接新娘時，相當「手下留情」，唔只俾兄弟團喺派開門利是時「講價」，連玩遊戲都只係要佢嘅赤腳踩入冰桶夾麻雀。Wilson宣讀愛的宣言，芷微聽得好開心。
 抱得美人歸，當然要錫啖啦！
Wilson喺2020年患上胃癌，並要切除大部分胃保命，期間芷微不離不棄，二人互相扶持。而喺大日子前夕，Wilson又突然入院做手術，令大家都好擔心，好彩佢最終都可以如期娶得美人歸。Wilson喺宣讀誓言時，回顧多年來二人經歷嘅點點滴滴時，都同芷微雙雙落淚，佢亦希望未來可以同老婆一齊互相睇住彼此變老。
 斟茶重金新娘邱芷微、邱媽媽、邱爸爸、新郎陳志忠
一對新人向女方父母斟茶，完成儀式後幸福錫錫，真係好閃！對於Wilson嘅深情誓言，芷微就表示好感謝老公一直好照顧自己，令佢好有安全感。Wilson則對芷微表示：「由今日起，我就係你人生上嘅隊友，直到永遠。」而二人對生育計劃就已經有曬打算，Wilson仲貼心咁對老婆講：「千祈唔好俾壓力自己，慢慢嚟，隨緣隨心就得。」
「賈名媛」邱芷微出嫁！