伊能靜57歲生日自稱幸福老女孩 收兒子小哈利親筆信顯母子情深

台灣「美魔女」 伊能靜 啱啱踏入57歲生日，佢喺社交平台分享咗唔少生日相片，相中所見，伊能靜頭戴皇冠，手持權扙，枱上仲有一個花花生日蛋糕，真係儀式感滿滿。除此之外，伊能靜更上載咗一張佢同老公秦昊、囡囡米粒陪伴慶生嘅相片，相當温馨。

伊能靜同老公囡囡一齊慶祝57歲生日
伊能靜留言指自己踏入57歲，無諗過到咗呢個年紀，竟然仲可以活成而家呢個模樣，成為一個既有能力愛人愛己，又能做喜歡事情嘅人，仲有好多夢想等待去實現。佢仲話開始嚮往60歲嘅自己，嗰種通透、清醒、灑脫嘅快樂，最後佢仲祝福自己，話自己係幸福嘅老女孩。
壽星女仲指自己開始嚮往邁向花甲之年

而伊能靜嘅大仔；已經22歲嘅小哈利，雖然人在英國工作，未能同媽咪一齊慶生，但佢都好sweet，特登透過工作室發布咗一封親筆信向媽咪示愛，佢寫道：「你又老了一歲，你總是叮囑我，要準備好面對你離去以後的生活，我每次都叫你不要說這麼不吉利的話，但是現在，想起你的我，只希望我能好好愛你，因為我知道我們的時間有限，因為我知道你為我奉獻了無數歲月，所以我想讓你開心，讓你安心，謝謝你教會了我如何去愛，我想跟你說，我很愛很愛你，我會用接下來一生的每一分每一秒去愛你」，字裡行間都流露住母子深厚嘅感情。
已經22歲身處英國嘅大仔小哈利，就撰愛心信多謝媽咪

而伊能靜亦回覆小哈利，佢表示「家人永遠都會喺你身後倍伴你，守護你，而你無需擔憂任何事，媽媽深信你是有愛的孩子，沒有懷疑。」

伊能靜亦回應囝囝對自己嘅祝福