古淖文推新歌獲中聲2戰友撐場 譚輝智驚出醜事前勤練舞姿

《中年好聲音2》冠軍古淖文（German）為新歌《Follow Me》舉行發佈會，獲12位《中聲2》戰友撐場之外，大批古粉亦一早到場支持，逼爆兩層商場欣賞偶像現場演繹新歌。German好感恩由比賽至出新歌，都一直獲古粉支持，希望新歌能吸納更多古粉。
古淖文舉行新歌發布會。
譚輝智完成工作後即時趕到發佈會，仲做足準備事前學新歌舞姿，以免German臨時叫佢獻舞，顏米羔話新MV每日至少睇三次，黃劍文覺得MV好洗腦，希望可以成為全世界嘅洗腦歌，繼而令German帶住佢哋去世界巡演，而陳俞霏唯一心願係想German成為國際巨星。
中聲2嘅戰友一齊嚟撐場。
新歌舞姿非常亮眼，但焦點就落咗German嘅胸肌，連佢本人都話拍攝時唔覺，喺睇製作品先覺得胸肌好突出。German話MV喺電視城2廠拍攝，能夠喺《中聲2》誕生嘅錄影廠取景，勾起好多回憶。
譚輝智話驚古淖文臨時叫佢獻舞，所以自己苦練咗先嚟。
輝智不時為旅行團演出，嚟緊佢就好威水，有旅行社為佢打造專屬列車，輝智笑指自己喺列車上好似吉祥物咁，遊走車卡同團友揮手影相。劍文近期挑戰拍攝飲食節目，佢都話心情緊張，甚至失眠，不過成個過程係一個好好嘅挑戰。女團MISSY舊年成團後曾經開騷，佢哋透露正籌備網上綜藝節目，增加同粉絲互動，繼而再決定出歌數量。
German教fans跳新歌嘅舞步。女團MISSY話籌備緊網上綜藝節目。