張學友譚詠麟合唱生日歌賀鍾鎮濤農曆70歲大壽 眾好友炮製驚喜

鍾鎮濤（阿B）噚晚喺微博上載一條與好友歡聚嘅照片，片中見一班圈中好友畀壽星神秘驚喜，張學友、曾志偉、葉童、梁家輝、劉嘉玲、關之琳、譚詠麟、杜德偉、陳友、彭健新、上山詩鈉及顧紀筠等早已喺餐廳等待，為鍾鎮濤慶祝農曆70歲大壽。

鍾鎮濤與范姜素貞到場後，由志偉開門，接著眾人大聲祝賀壽星並合唱生日歌，場面非常溫馨，鍾鎮濤見眾好友齊集為佢慶祝，笑到四萬咁口，歌神張學友、譚詠麟再次唱生日歌，梁家輝及杜德偉分別向台上嘅鍾鎮濤送上抱抱。