周杰倫上海演唱會開騷前現集體退票 黃牛賣家憂血本無歸

周杰倫巡迴演唱會上海站於今晚 (12號) 正式開鑼，今次佢喺上海舉行演唱會連唱四日，令一眾樂迷相當期待，早前掀起撲飛熱，個唱門票一票難求，演唱會開騷在即，竟然爆出退票潮！

據內地媒體報道指周杰倫上海演唱會黃牛票炒過萬元人民幣，今日一班黃牛黨開始集體退票，黃牛賣家透露因主辦方原定畀「錄入信息如今不兌現」，所以黃牛紛紛退票，之前黃牛黨喺買飛時綁定身份證資料，轉手後可以修改自己嘅資料，令食炒價嘅買家順利進場，不過今次黃牛卻失預算，主辦方喺最後幾日都唔畀改資料「不得轉贈」，演出前48小時以內更不准退票，頓時令黃牛賣家憂血本無歸，只好申請退票硬食20%手續費。

由於今次上海演唱會嚴厲執行實名制，喺強實名制之下，黃牛購買嘅演唱會門票均唔可以轉售、轉讓或轉贈，根本冇辦法放售，連回本都成問題，更唔好諗有機會賺炒價賺一筆，而網民好支持主辦方嘅做法，嚴打黃牛炒賣！據內地規定舉行演唱會必須採取實名制，主要目的就係打擊黃牛非法囤票嘅行為。