張敬軒簽名彩膠唱片拍出71萬天價 稱拍賣價遠超本身價值急回收

眾向周知張敬軒有鋪收藏癮，特別係對啲舊時代產物情有獨鍾，大至古董傢俬，細至手錶figure，都係軒公嘅收藏之一。由於收藏品越嚟越多，加上軒公又做唔到斷捨離，所以為咗幫呢啲收藏品搵返個好歸宿，軒公就同團隊創建咗個只供其Fans Club會員參與嘅拍賣網，將一啲珍藏放到網站畀fans拍賣，而拍賣所得嘅收益亦會用作Fans Club營運。
張敬軒早前拎出佢收藏嘅黑膠畀fans拍賣。
Fans Club首日拎出嚟拍賣嘅珍品，就係兩張軒公演唱會親筆簽名彩膠唱片，一張編號為0000，而另一張則係軒公嘅生日日期0201。點知兩張彩膠唱片一出，就令fans們為之瘋狂，更創下 $710,850嘅成交價，嚇到軒公急急同團隊開會，最後決定重新收回呢兩張彩膠唱片。
軒公兩張唱片拍出天價。
軒公喺社交平台發文，指呢次拍賣所拍得嘅價錢，已經遠遠超過呢兩件物件本身嘅物理價值，亦都違背咗佢哋開初設立網站嘅初衷：「我哋内部商討之後，我哋聯絡咗拍得呢兩隻黑膠嘅兩位朋友，亦都解釋咗我哋做呢一個auction section嘅初衷同理念，好多謝呢兩位朋友嘅體貼同埋諒解，呢兩張黑膠唱片會由HCFC 重新收回，連同原本稍後推出嘅25張特別編號黑膠唱片暫時一併封印，等待將來有更合適嘅場合，再話畀大家知可以點樣參與。」

唔少網民知道軒公呢個處理方法後，都理解佢唔想fans花咁多錢嘅原因，同時亦讚軒公呢個做法相當窩心呀。

軒公有唔少收藏品。