瑪姬百萬鋼琴自彈自唱 好友周吉佩義助拍MV

有英國皇家音樂學院8級鋼琴資格嘅瑪姬，日前喺網上平台上載首次自彈自唱嘅作品，翻唱盧廣仲嘅《刻在我心底的名字》，瑪姬動用價值過百萬嘅三角琴自彈自唱圓心願，仲邀請啱啱奪得《中年好聲音》冠軍嘅好友 周吉佩 幫手拍攝，瑪姬話：「雖然只係彈奏相對簡單嘅流行曲，但係都想用最靚嘅琴聲優雅咁去演繹，一係唔做，一做就盡力做好。」

瑪姬又話要多謝吉吉參賽中都偷時間幫手：「好多謝吉吉咁忙都抽時間幫我拍MV，其實我哋入行前已經喺參加歌唱比賽認識，咁多年嚟大家都無放棄追夢，縱然我專注咗主持工作，而佢亦都曾經轉戰幕後，但好開心見到佢終於夢想成真，絕對係實至名歸。」

瑪姬透露其實第二首自彈自唱cover亦已完成拍攝，笑言：「而家最擔心係吉吉贏咗冠軍之後太忙無時間做後期製作。」